2014年11月25日 星期二

我的入廚日記 - 黑木耳鮮百合炒蝦仁



很久沒有買新鮮百合來做菜,恰巧在超市遇上鮮黑木耳,

二話不說放進購物車內,腦海已浮現蝦仁、露筍等食材......

幾種材料加起來不僅只健康有益,還不失為一道美味的宴客佳餚。


食材加起來差不多九十多元,多昂貴呢 ~

























食材雖貴,但只要吃得開懷又安心,一次半次的「奢侈 」也不為過!

吃住家飯始終較外邊用餐便宜,且健康。






 




















↑驟眼看比蒜頭大,郤比洋葱小,外層沾滿泥沙的白色根狀植物,就是百合了。


新鮮百合很容易熟透,烹調時不應太早加入,快手兜勻,即成。

生吃當沙律亦可,切記要放入滾水中灼一會,方可食用。



- - - - - - - - - - - - - - - - - - - - - - - - - - - - - - - - - - - - - - - -


黑木耳鮮百合炒蝦仁


材料:(2-3人份量)

蝦仁 250克,露筍(粗身) 300克,鮮黑木耳 200克,


鮮百合 1棵,蒜蓉及薑米 --- 各1茶匙,甘筍 / 紅蘿蔔花 8片

























蝦醃料:

鹽 1/2茶匙,胡椒粉 少許,蛋白 1個


調味汁料:

鹽 1/4茶匙,蠔油 1茶匙,清雞湯 80毫升


粟粉芡:

粟粉 1茶匙,清水 1湯匙


製法:

1. 將蝦去殼、去腸,洗淨,印乾水份,伴入醃料醃約20分鐘。

2. 露筍切去尾部及硬皮,斜切成段;黑木耳去掉根部(需要時,可切小塊)。

3. 鮮百合取瓣後,洗淨,泡水一會,瀝乾水分,備用。

4. 燒熱鑊,下2湯匙油加入蝦仁炒至轉色,盛起。

5. 原鑊下1湯匙油,下蒜蓉、薑米爆香,加入露筍、黑木耳、甘筍花炒香。

6. 下調味汁料煮滾,蝦仁回鑊,快手兜炒一會,再加入鮮百合炒勻。

7. 最後以粟粉水埋芡,即可享用。


溫馨提示:

- 令蝦仁有鮮嫩口感,除可用蛋白醃外,炒拌時間不宜過長。

- 黑木耳口感極好,甚有咬頭;其熱量低,含豐富膳食纖維,有助腸胃蠕動。

- 黑木耳並具有降血壓,暢通心血管的功效。

- 鮮百合多以真空包裝出售,可於超級市場或街市選購(約30多元包)。


鮮百合處理大法:

1. 鮮百合不應過早炒拌,以免因高溫減去其清甜味道,也容易變黑。

2. 鮮百合比較髒,處理時應擇出一瓣瓣,更要去掉百合上的黑邊。

3. 然後用清水清洗數次,並泡在水中一會後才瀝乾水分。


10 則留言:

  1. 九十幾蚊一個餸,好貴呀,不過新鮮白合好好食,我都好like 呀~~~~
    嘻....主任好幸福 ^^

    回覆刪除
    回覆
    1. Sammi, 係呀 ~ 所以呢個餸只可以久不久一次,但其實...小高望返d相又想食啦!XD

      刪除
  2. 嘩~90幾蚊~拍得住食海鮮喎小高~~~~
    不過健康又好味~都值返呢~!

    回覆刪除
    回覆
    1. 黃師奶,係...查實呢個價錢真係拍得住食海鮮,不過久不久一次都ok!
      而且裡頭的材料真係好健康,好好味!^^

      刪除
  3. 新鮮百合, 蘆筍愈來愈貴,所以這個餸已經知道唔平,但冇諗過要90幾蚊。不過,呢個餸清清地健康,係人都好喜愛

    回覆刪除
    回覆
    1. 買果時真係唔覺唔覺,到睇返張單就知有幾貴,要啦百合、露筍、蝦仁各自都要三十多元,仲未計鮮木耳$16.x、雞湯等材料,不過偶然一次半次,而且健康d,呢個價錢都ok!

      刪除
  4. 有袁生兩大勁敵 ~木耳及百合~ , 如果我煮俾佢食 , 我相信佢只會食蝦仁 ^^

    回覆刪除
    回覆
    1. 鮮百合好好味架...不過粉粉地的質感未必人人o岩食!咁無計啦 ~

      刪除
  5. 我係超中意食百合的~ 好味啊!!!

    回覆刪除
    回覆
    1. 小洚小洚,你近來幾好嗎?一定公私兩邊忙!
      鮮百合真係好好味,小高又係,好鐘意!^o^

      刪除

Related Posts Plugin for WordPress, Blogger...